Na Mwandishi Wetu
MWANAMUZIKI na muigizaji wa filamu nchini Baby Madaha amesema kuwa amani ni nguzo muhimu katika kukuza ubunifu na kuleta maendeleo ya kweli kwa taifa.
Akizungumza kuhusu nafasi ya wasanii katika jamii, Madaha amesisitiza kuwa ni jukumu la kila msanii kuhakikisha anaitunza na kuilinda amani iliyopo nchini kwa kutumia kazi zao kuelimisha na kuhamasisha jamii. Amesema sanaa ina nguvu kubwa ya kufikisha ujumbe, hivyo ni muhimu kutumiwa kwa njia chanya ili kudumisha mshikamano wa kitaifa.
Madaha alieleza kuwa bila kuwepo kwa amani, mazingira ya ubunifu hayawezi kustawi. Aliongeza kuwa hali ya sintofahamu na machafuko huondoa kabisa thamani ya kazi za sanaa, pamoja na kudhoofisha uchumi wa wasanii na taifa kwa ujumla.
“Bila amani, hatuwezi kuwa na wasanii wakubwa wala mafanikio ya kifedha. Hakutakuwa na utawala bora, wala sheria hazitafanya kazi ipasavyo, kwani kila mtu atafanya anavyotaka. Hili si jambo linalofaa katika taifa lolote,” alisema Madaha.
Aidha, amewahimiza wasanii wenzake kutumia vipaji vyao kuhamasisha amani, umoja na mshikamano. Alibainisha kuwa bila amani, hata fursa za kufanya maonesho na kukuza vipaji hupotea, jambo linalorudisha nyuma juhudi za maendeleo.
“Wasanii wenzangu, amani ndiyo msingi wa kila kitu. Bila amani hatuwezi kufikia mafanikio tuliyojiwekea wala kufanya maonesho kokote. Mwisho wa siku tutapoteza kila kitu na kukosa nchi ya kujivunia,” alisisitiza.
Kwa ujumla, kauli ya Madaha inaakisi ukweli kwamba amani si tu hitaji la kijamii, bali ni nguzo muhimu ya maendeleo endelevu na ustawi wa sekta ya sanaa pamoja na taifa kwa ujumla.