HAMAD RASHID: FILAMU HII ITUFUNZE KUJENGA TAIFA LENYE UMOJA NA AMANI

 Filamu ya uchunguzi iliyotengenezwa na mwanahabari wa uchunguzi kutoka Nigeria anayeishi Ghana, David Hundeyin, imezua mjadala mpana kuhusu nafasi ya vijana, wajibu wa vyombo vya habari na umuhimu wa kulinda amani na utulivu katika jamii za Afrika.

Akizungumza baada ya kuonyeshwa kwa filamu hiyo, Waziri wa zamani wa Afya Zanzibar na mwanasiasa mkongwe, Hamad Rashid, amesema kazi hiyo imefungua macho ya wananchi kuhusu namna matukio makubwa ya kijamii na kisiasa yanavyoweza kuathiriwa na nguvu za nje. Amesisitiza umuhimu wa Waafrika kujenga uwezo wa kufanya tafiti na uchunguzi wa kina kuhusu masuala yanayowahusu.

Amesema pamoja na filamu hiyo kutoa mafunzo muhimu kwa jamii, hatua inayopaswa kuchukuliwa sasa ni kutumia yaliyobainishwa kama somo la kujenga taifa lenye amani, umoja na maendeleo badala ya kuendeleza migawanyiko.

"Changamoto kubwa zinazowakabili wananchi ni ajira, afya, elimu na ustawi wa maisha. Nguvu kubwa inapaswa kuelekezwa katika kutatua mahitaji hayo kwa manufaa ya jamii na taifa kwa ujumla," amesema Hamad Rashid.

Kwa upande wake, mwanazuoni na mchambuzi wa masuala ya maendeleo kutoka Zimbabwe, Joshua Maponga, amesema filamu hiyo imeonesha umuhimu wa vyombo vya habari vya ndani kuwa na uwezo wa kuripoti kwa kina masuala yanayotokea katika jamii zao ili kutoa taswira halisi kabla simulizi za nje hazijatawala mjadala.

Ameongeza kuwa vijana wanapaswa kuwa waangalifu dhidi ya ushawishi unaoweza kuwaingiza katika migogoro inayoweza kuhatarisha mustakabali wao na maendeleo ya nchi zao. Amesema nguvu za vijana zinapaswa kuelekezwa katika ubunifu, uzalishaji na ujenzi wa uchumi badala ya kushiriki katika matukio yanayoweza kuhatarisha amani na utulivu.

Akielezea sababu za kuandaa filamu hiyo, David Hundeyin amesema lengo kuu lilikuwa kuonesha namna ushawishi wa nje unavyoweza kujitokeza katika jamii za Afrika kupitia njia mbalimbali, ikiwemo mitandao ya kijamii na mashirika yenye maslahi ya kisiasa au kiuchumi.

Amesema Waafrika wengi bado hawatambui kwa kiwango kikubwa namna masuala ya kimataifa yanavyoweza kuathiri maisha yao ya kila siku, hivyo aliona umuhimu wa kutumia filamu hiyo kama mfano wa kuhamasisha uelewa mpana kuhusu athari za siasa na maslahi ya kimataifa katika maendeleo ya bara la Afrika.