RAIS SAMIA AZINDUA AWAMU MPYA YA UTETEZI WA HAKI

Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, amewaapisha rasmi Majaji wa Mahakama Kuu aliowateua hivi karibuni kuwa Majaji wa Mahakama ya Rufani, katika hafla iliyofanyika Ikulu jijini Dar es Salaam. 

Akizungumza mara baada ya kukamilika kwa kiapo hicho, Rais Dkt. Samia amewasisitiza viongozi hao wapya wa mhimili wa mahakama kutekeleza majukumu yao kwa uadilifu mkubwa, uwajibikaji wa hali ya juu na uzalendo uliotukuka. 

Amewakumbusha umuhimu wa kutambua uzito wa dhamana waliyopewa, ambayo inalenga kusimamia kwa ukaribu haki za wananchi pamoja na maslahi mapana ya Taifa kwa ujumla.

Uteuzi huu wa viongozi katika ngazi ya juu ya mhimili wa utoaji haki nchini ni sehemu ya mikakati ya makusudi ya Serikali ya kuimarisha mfumo wa utoaji haki, ikijumuisha kukabiliana na changamoto ya ongezeko la mashauri na kukidhi mahitaji yanayokua ya wananchi. 

Katika kuunga mkono mabadiliko hayo, Rais Dkt. Samia ameweka wazi kuwa Serikali itaendelea kuwekeza na kuiwezesha Mahakama ili kuongeza ufanisi wa kiutendaji na kuhakikisha wananchi wanapata huduma za kisheria kwa wakati bila kuchelewa. Pia ametoa wito kwa Majaji hao kuzingatia maadili ya kazi, nidhamu na matumizi ya busara katika maamuzi yao ili kulinda hadhi ya Mahakama na kudumisha imani ya umma kwa mhimili huo muhimu.

Majaji waliopishwa ni Mhe. Imani Daud Aboud, Mhe. Rabia Hussein Mohamed, Mhe. Dkt. Yose Joseph Mlyambina, Mhe. Immaculata Kajetan Banzi, Mhe. Cyprian Phocas Mkeha, Mhe. Yohane Bokobora Masara, Mhe. Dkt. Juliana Laurent Masabo, Mhe. Abdi Shaaban Kagomba, na Mhe. Mzee Ibrahim Ibrahim, ambao sasa wanaingia rasmi kwenye majukumu yao mapya ya kusimamia haki katika ngazi ya Mahakama ya Rufani.