BAADA ya matukio yaliyotokea Oktoba 29, 2025, kiongozi wa Kanisa la Maombezi (GRC), Mchungaji Anthony Lusekelo (‘Mzee wa Upako’), ametoa wito kwa Watanzania kutafakari na kujifunza kutokana na tukio hilo, akieleza kuwa lilitikisa sana heshima ya Taifa na halipaswi kurudiwa kamwe.
Kauli hii inatolewa huku Wito wa Kitaifa wa Rais Dkt. Samia Suluhu Hassan wa kulinda amani ukiendelea kusambaa kwa kasi miongoni mwa wananchi na vijana.
Mchungaji Lusekelo ameeleza kuwa tukio hilo limekuwa uzoefu mchungu ambao Watanzania hawakuwahi kuupitia, akifananisha hali iliyotokea Oktoba 29 na "vita ya wenyewe kwa wenyewe," na kulifananisha na mazingira ya vita ya 1977/1978 dhidi ya Idd Amin.
Akitoa pole kwa wakazi wa Dar es Salaam, Arusha, Songwe na Mwanza walioathirika, amesisitiza kuwa hali hiyo iligusa Watanzania bila ubaguzi, akitaja hata baadhi ya waumini wake maeneo ya Kimara waliathirika.
Alisema ipo haja viongozi wa dini, wazazi, viongozi wa serikali na kisiasa kutafakari namna heshima ya nchi ilivyotikisika na umuhimu wa kurejea kwenye misingi ya umoja na ustaarabu.
Amewaonya Watanzania kuwa ni muhimu yale yaliyotokea yakawa funzo, kwani huenda Taifa likakumbana na tukio kubwa zaidi baada ya miaka michache ijayo endapo amani haitalindwa.
Maoni haya ya viongozi wa dini yanaungana na msimamo thabiti wa Mheshimiwa Rais Dkt. Samia Suluhu Hassan, ambaye alitoa wito kwa Watanzania wote kulinda amani.
"Serikali Haitaruhusu Nchi Ivurugwe: Tutailinda Nchi kwa Nguvu Zote."
Wito huu umeelekezwa hasa kwa vijana, kuwakumbusha kuwa Amani ndiyo mtaji mkuu wa elimu, ajira, na biashara yao. Wamehimizwa kukataa kauli yoyote yenye nia ya kutugawa au kuvuruga utulivu tulionao.
Kauli za wananchi zilizotolewa mtandaoni baada ya tukio zinaonesha jinsi ujumbe huu unavyopokewa:Kujifunza na Kusamehe: Raia wengi wanakubaliana kwamba, "Ni kuelewana tu, tukikaa chini kila kitu kitakuwa sawa," huku wakisisitiza: "Tujitolee kusamehe, lakini tusisahau umuhimu wa kujifunza kutoka kwa makosa ya zamani."
Wananchi wamehimiza kuwa amani lazima idumishwe, lakini iambatane na haki kwa kila Mtanzania.
Ujumbe wa Rais umeeleza wazi kuwa kulinda nchi si kazi ya vyombo vya ulinzi pekee: "Ni jukumu la kila mmoja wetu, tukiwa na uzalendo na upendo kwa Taifa letu. Tuwe walinzi wa Amani katika familia, vitongoji, na maeneo yetu ya kazi."
Watanzania kwa ujumla wanakubaliana kwamba tukio la Oktoba 29 ni "kidonda tusichopaswa kuingiza tena mdudu", na kwamba suluhisho la kudumu linaanzia kwenye umoja, upendo na mazungumzo ya kiungwana.
@@@@@@@@@@@@@@
Uchumi Wetu Hauna Likizo ya Maandamano: Sauti za Wajasiriamali Zinataka Amani
Wakati Watanzania wakiendelea na shughuli zao za kujenga Taifa, wito wowote wa kufanya maandamano yasiyo na ukomo, kama ule unaotangazwa kwa Desemba 9, unazua hofu kubwa kwa jamii ya wafanyabiashara na wajasiriamali wadogo. Wanaeleza wazi kuwa amani ni mtaji mkuu wa kiuchumi.
Kulwa Mtebe, mjasiriamali kutoka Bariadi, Simiyu, anasema wazi: "Suala la amani na utulivu katika nchi yetu ni la muhimu sana. Kwenye nchi tukikosa hivyo vitu, mambo ndiyo yanakuwa magumu zaidi. Biashara inategemea utulivu. Mauzo ya leo yanategemea amani ya jana." anasema Mtebe.
Aidha amesema katika mahojiano kwamba maandamano ya siku moja tu yanaweza kuingiza hasara ya mamilioni na kuvuruga minyororo ya ugavi, hasa kwa wajasiriamali wadogo wanaoishi kwa kipato cha siku.
"Kama nchi ikikosa amani, hakuna jambo litafanyika, tunawaona wenzetu ukosefu wa amani unavyowatesa." alisema Mtebe
Wataalamu wa uchumi wanaonya kuwa mbali na hasara ya moja kwa moja, miito ya vurugu inapunguza imani ya wawekezaji wa ndani na nje. Rais Samia Suluhu Hassan amekuwa akisisitiza juu ya umuhimu wa kuwavutia wawekezaji; kauli hizi za maandamano zinahatarisha juhudi hizo.
Ujumbe mkuu kwa vijana na wajasiriamali ni kuepuka kurubuniwa na miito ya kutatiza shughuli za kiuchumi, kwani kufanya hivyo ni kujipiga pigo wenyewe. Amani ndiyo mwavuli unaolinda kazi, mitaji, na soko lao.
@@@@@@@@@@@@@@@@
Amani huokoa wanawake na watoto na kulinda ustawi wa familia
Katika jamii ya Tanzania, wanawake na watoto ndio wanaoumia zaidi pale amani na utulivu wa nchi unapovurugika. Maoni kutoka mkoani Simiyu yanaonesha kuwa jamii inathamini amani kuliko siasa.
Spora Ngh’wani, mkazi wa Bariadi, anaelezea hofu yake: "Amani na utulivu ni muhimu sana katika jamii, nchi na hata familia. Sisi wanawake ndiyo tegemeo kubwa kwa familia zetu, ndiyo wajasiriamali, walezi wa familia pia. Amani ikitoweka, watu wa kwanza kupata shida ni sisi wanawake na watoto wetu. Sisi tunapenda amani kuliko vitu vyote."
Kauli hii inaungwa mkono na Rebeca Shilinde wa Busega, anayesisitiza athari za kisaikolojia: "Kama binadamu ukikosa amani na utulivu hata moyoni mwako huwezi kufanya kazi yoyote ile, kila wakati utabaki na wasiwasi mkubwa. Hivyohivyo nchi ikikosa amani na utulivu hakuna jambo litafanyika. Kila Mtanzania anayo sababu ya kuilinda hii amani."
Ustawi wa jamii unategemea amani. Ukosefu wa amani unavuruga elimu ya watoto, unazuia upatikanaji wa huduma za afya, na unaleta hofu isiyo na msingi kwa wazazi.
Ujumbe mkuu unaotolewa na sauti hizi ni kwamba hakuna malengo ya kisiasa yanayoweza kuhalalisha kuvuruga ustawi na amani ya familia. Maandamano ya vurugu ni chanzo cha hofu, na wananchi wanashauriwa kukataa miito yote inayohatarisha maisha yao na ya vizazi vyao.
!##############